Arburu

Sabando, Zekuiano, Leortza, Maeztu eta Atauri artean gailentzen den mendialde eder bat bada, isurialde gehienetan ertz amilkor batez ebakita dagoena. Gainaldean haritzez tartekatutako larre harritsuak dira nagusi, "dehesa" itxurako paisaia eratuz leku askotan; orografia zakarragoa den eremuetan basoa eta sastrakadia nagusitzen da, pagadia ere bai leku batzuetan. Gora-beherak ez dira handiak eta karaitzezko mendialde horretan beheragoko bailaratatik gehien nabarmentzen diren ertzak dira izenez seinalatuta gelditu direnak. Nabarmenena Arburu hau da, eta mendialde osoa izendatzeko ere erabiltzen da. Sabando aldeko amildegian dago kokatuta eta erpin geodesikoa eta txartelontzia dauzka. Mendibiribil izeneko beste gailur bat dauka iparraldean, eta Santa Ageda izeneko beste bat hegoaldeko ertzeko haitz batzuetan, urrutira gabe.