Ballo

Ballo Arabako lautadatik abiatuta igo daitekeen mendi ederrenetako bat da, bai lautadaren gain eskaintzen duen ikusmira zabalarengatik, bai San Roman aldeko igoera entretenigarriagatik eta bai gainaldeko paisaiarengatik. Haitz mutur zorrotzak erakusten ditu San Roman herriaren gainean eta autobidetik ziztu bizian pasatzen denak ere ezin du hari begiratu bat bota gabe paretik pasa. Ipar eta mendebaldeko amildegi horien atzean ordea Legaireko larre eta baso ederrak daude, gora-behera apaleko eremu zabalean. Baso eta larre horietan barrena dator Opakua aldeko bidea, ertzari jarraituz. Atauko mendatea da beste aukera, ekialderago, larrean barrena edo ertzari jarraituz etortzeko.
Mirutegirena da tontor nabarmenena, gurutzea duena, baina Ballo metro batzuk gehiago da, Opakua aldera jotzen duen ertzean. Atau da hirugarrena, ekialderago, amildegiaren ertzean. Neke handirik gabe egin daiteke hiruren arteko bidea, elkarrengandik gertu egoteaz gain gustora ibiltzeko lekua baita.