Ez da mendi ikusgarria eta Irakurriren gertutasunak eta tontorretik gertu dagoen emisoreak (errepidea bertaraino) itzaltzen dute bere izena. Eta izenaz ari garela, Mikel Belaskok bere hiztegian "Iruñeko Harria"-ren etimologiaren alde egiten du, erabat baztertuz batzuetan entzun den "Hiru-oin-harri"-arena.
Zutarri ikusgarriak salbatzen du mendi honetako gailurra, errepideak eta antenak desitxuratua. Gure geografiako beste hainbat harri ospetsuren antzera, Iruñarriko zutarriak ere bere kondaira dauka: Erroldanek Iruñera jaurti nahi izan zuen harri hau, baina, Nafarroako hiriburuko biztanleen zorionerako, erraldoi gaiztoak punteria eskasa izan eta harrikada mendi honetako gailurrean erori zen.
