Olataguas

Lokiz mendilerroa defendatzen duten malkarretako gailurrak dira dudarik gabe ezagunenak, baina Nafarroako mendimultzorik zabalenetakoa hobeki ezagutu nahi izanez gero, barnealdeko gainetara ere hurbildu beharko dugu.
Olataguas Lokizko larreak menderatzen dituzten bizkar luze eta erliebe leuneko horietako bat da. Hegoalderago dagoen Arastegi gaina bezala, lurralde harritsu eta malkartsu samarra da, baso ez oso sarri batek estalita. Hegoaldetik iristen den bideak bitan banatzen du mendia, antzeko altuerako bi gailur utziz alde bietara. Badirudi punturik altuena ekialdekoan dagoela, eta bertan topatuko dugu mendizaleek jarritako harri pila.